भक्तपुर – राष्ट्रिय स्वतन्त्र पार्टी (रास्वपा)ले आफ्नो सभापति रवि लामिछानेलाई गैरकानुनी ढंगबाट पक्राउ गरिएको भन्दै त्यसको भर्त्सना गरेको छ।
शुक्रबार भर्चुअल माध्यमबाट बसेको रास्वपा केन्द्रीय सचिवालयको बैठकले सभापतिलाई पक्राउ गर्दा प्रहरीले गरेको कार्यको भर्त्सना गर्ने निर्णय गरेको हो।
रास्वपाले प्रहरी पक्राउ पुर्जी नै नलिइ सभापतिको घरमा पुगेको र सभातिकै बेडरूमभित्र बसेर पुर्जी लेखेको बताएको छ। नागरिकको घरभित्र छिरेर कानुनी कागजात बनाउने गैर-संवेदनशील र गैरकानुनी कुराको भत्सर्ना गर्छौं,’ रास्वपाको निर्णयमा भनिएको छ।
लामिछानेलाई प्रहरीको केन्द्रीय अनुसन्धान ब्युरोको टोलीले उनको घरमै पुगेर पक्राउ गरेको थियो। पक्राउ गरेपछि सिआइबीले जिल्ला प्रहरी परिसर काठमाडौंलाई बुझाएको थियो। हिजो राती अबेर पक्राउ भएका लामिछाने अहिले काठमाडौं प्रहरी परिसरको हिरासतमै छन्। आज उनलाई रूपन्देही लगिनेछ। बुटवलको  सुप्रिम सहकारीको बचत अपचलन र संगठित अपराधमा रूपन्देही जिल्ला अदालतले यसअघि लामिछानेलाई १ करोड धरौटीमा छाड्ने आदेश गरेको थियो।
त्यो आदेश बदर गर्न र साधारण तारेखमा छुट्न माग गर्दै लामिछानेले उच्च अदालतमा निवेदन दिएका थिए। उच्चले जिल्ला अदालतको आदेश उल्ट्याएर पुर्पक्षका लागि थुनामा पठाउन आदेश गरेपछि लामिछाने गएराति नै पक्राउ परेका हुन्।