किराँतिहरुको उद्गम स्थल मानिने “साल्पा सिलिचुङ” को साल्पा पोखरि परिसरमा तीन चुलो (सुप्तुलुङ) सहितको मुन्दुमि पुजाथान र सृष्टि कर्ता सुम्निमा पारुहाङको विशाल प्रतिमा अनावरण गरिएको छ । साल्पा सिलिचुङ परियोजना अन्तर्गत भैइ रहेको निर्माण कार्यको यस दोश्रो चरणको ऐतिहासिक अनावरण कार्यक्रम साल्पा सिलिछो गाउँपालिका अध्यक्ष दौलत कुलुङ ज्युको उपस्थितिमा मुन्दुमि नायक नक्छोङ विजुवाहरुले किराँत मुन्दुम विधि द्वारा औपचारिक अनावरण गरिएको साल्पा सिलिचुङ सरोकार संरक्षण तथा प्रवर्द्धन केन्द्र अन्तर्राष्ट्रिय समितिको आर्थिक समिति सदस्य भिम राई “अनन्त” ले बताउनु भयो ।

साल्पा सिलिचुङ सरोकार संरक्षण तथा प्रवर्द्धन केन्द्र अन्तर्राष्ट्रिय समिति ले स्थानिय सरकार साल्पा सिलिछो गाउँपालिका भोजपुर संगको समन्वयमा गरि रहेको साल्पा सिलिचुङ-सिलिछो परियोजनाको पहिलो चरणको प्रतिमा अनावरण कार्यक्रम गत वर्ष २०८१ बैसाख ७ गते सिलिचुङको चुचुरोमा सुम्निमा पारुहाङको प्रतिमा र सिलिचुङको फेंद साल्पा पोखरिमा नक्छुङ (धामि) को प्रतिमा स्थापना गरेर सम्पन्न गरिएको थियो । लगभग साढे तीन बर्षको दौरानमा रहेको यश साल्पा सिलिचुङ-सिलिछो परियोजनाको महा अभियान किराँत सभ्यता संस्कृति मुन्दम र अस्तित्व बचाउने अनि नयाँ पुस्ता हस्तान्तरण गर्ने उदेश्यले संसारभरका किराँती र किराँतजन्य संघ संस्थाहरुलाई जोडेर किराँत सांस्कृतिक सम्पदाको रुपमा साल्पा सिलिचुङ परियोजना सम्पन्न गर्न लागिएको पनि आर्थिक समिति सदस्य राईले बताउनु भयो । सृष्टि र मुन्दुमको उत्पति थलो, किराँत धार्मिक सांस्कृतिक स्थल साल्पा सिलिचुङमा मुन्दुमि ब्याख्या र विश्लेषण सहितको किराँत आदिम पुर्खा सुम्निमा पारुहाङको प्रतिमा निर्माण संगै अब अन्तिम चरणमा वाबुक सोलेवाको विशाल मुन्दुमि गेट निर्माण साथै सुम्निमा पारुहाङले मानव सृष्टिको सुरुवात गर्ने क्रममा महत्त्वपूर्ण भूमिका खेलेका मुन्दुमि पात्रहरुको संरचना बनाएर यश ऐतिहासिक परियोजना सम्पन्न गर्ने कुरा पनि समितिले बताए ।