‘अगिले ‘बाबरी’ राम्रोसँग चलिरहेको भएता पनि दर्शकहरुले टाइममा शो छैन भनेर गुनासो गरेको समेत निर्देश पौडेलले बताए । यस विषयमा बोर्डसँग कुरा गर्दा भुवन दाईले मेरो हातमा केही छैन भन्नुहुन्छ । अनि बोर्डसँग नै नेपाली फिल्मलाई बचाउने अधिकार छैन भने बोर्डको के काम ? बोर्डले सक्दैन भने भुवन दाईले राजीनामा दिए भइगयो नी । नेपाली फिल्मको प्रवद्र्धनका लागि स्थापना भएको बोर्डले नेपाली फिल्मको पक्षमा काम गर्न सक्दैन भने खारेज गर्नुपर्छ,’ उनले भने । चलचित्र निर्माता संघका अध्यक्ष नवल खड्काले पनि विदेशी फिल्मको प्रवद्र्धन गर्ने हो भने बोर्ड खारेज गर्नुपर्ने बताए । उनले नेपाली फिल्मको हितको लागि आफूहरु बोर्डविरुद्ध चाँडै आन्दोलनमा जाने समेत चेतावनी दिए । उनले भने- ‘विदेशी फिल्म महिनाको एक पटक मात्रै चलाउने कोटा ल्याउनुपर्छ । नेपालमा विदेशी फिल्मलाई कोटा सिस्टममा लैजानुपर्छ । यसको लागि हामी दशैं-तिहार सकिने बित्तिकै आन्दोलन गर्छौं । नेपाली भाषालाई समाप्त पार्ने षड्यन्त्र हामीलाई मान्य छैन ।’

फिल्मका मुख्य अभिनेता धिरज मगरले दर्शकबाट उत्साहजनक प्रतिक्रिया पाउँदा समेत शो नबढेकोमा दुखेसो पोखे । उनले भने- ‘फिल्मले राम्रो रेस्पोन्स पाएको छ । शो हाउसफूल भएको छ । पोखरा, दमक, धरान सबै शहरहरुमा दर्शक उपस्थिति एकदमै राम्रो छ । फिल्मलाई दर्शकले दिएको माया जस्तै शोमा पनि पाउनुपर्‍यो ।’ नेपाली फिल्महरुलाई पहिलो प्राथमिकता दिनुपर्नेमा उनले जोड दिए । अभिनेत्री अदिती बुढाथोकीले फिल्म राम्रो बनेको र दर्शकबाट पनि राम्रो प्रतिक्रिया पाएकाले शो बढाउनुपर्ने बताइन् । त्यस्तै, निर्मात्री पुष्पलता बुढाथोकीले नेपाली फिल्ममाथि भएको अन्यायको बारेमा सरकारले सहयोग गर्नुपर्ने धारणा राखिन् । आफूहरुले फिल्म बनाउँदा यस्तो समस्या आउँछ होला भन्नेबारे अनभिज्ञ रहेको र अहिले फिल्मको शो घटाईएको सूचना आएको भन्दै कसको कारण यस्तो भएको हो भनेर थाहा नभएको बताइन् ।